دل و دماغ پر بوجھ

دل و دماغ پر ایک بوجھ سا رہتا ہے طبیب ذہنی سکون کی گولیاں تجویز کرتے ہیں‘ سرکاری ملازمت کرتا ہوں‘ دفتر میں کوئی شخص میری بات نہ مانے تو سربھاری ہوجاتا ہے اور جھٹکے سے لگتے ہیں‘ دماغی کیفیات قابو سے باہر ہوجاتی ہیں‘ طرح طرح کے خیالات ذہن پر یلغار شروع کردیتے ہیں سارا دن دماغی الجھن میں گزرجاتا ہے۔ آج سے دس برس قبل میں بالکل ٹھیک تھا لیکن پھر اس کیفیت کا سامنا کرنا پڑا۔ اسی زمانے میں اور پھر بعد میں بعض گھریلو الجھنوں کا سامنا کرنا پڑا کبھی سوچتا ہوں کہ یہ سب کچھ میری وجہ سے ہوا ہے اور کبھی جادو و سحر کا خیال آتا ہے لوگوں سے اچھی طرح ملنے کی کوشش کرتا ہوں لیکن ذہنی دباؤ مجھے متوازن نہیں رکھتا۔ لوگوں سے اس طرح بات کرتا ہوں جیسے جذبات سے عاری کوئی شخص بات کرتا ہے خود کو تبدیل کرنا چاہتا ہوں لیکن تاحال کامیابی حاصل نہیں ہوئی ہے۔  (سہیل سرور‘ قصور)
جواب: صبح سورج نکلنے سے پہلے باوضو ہوکر یہ عمل کریں۔ ایک لوٹے یا گلاس میں پانی لے کر کسی کیاری یا گملے کے قریب بیٹھ جائیں چلو بھر پانی لیں ایک مرتبہ یَاوَدُوْدُ پانی پر دم کرکے پانی اس طرح ناک کے نتھنوں میں داخل کریں جیسے وضو کرتے وقت کیا جاتا ہے پانی اتنا داخل کریں کہ ناک کی جڑوں تک اوپر چلا جائے۔ پھر اس پانی کو کیاری یا گملے میں گرا دیں اس عمل کو سات مرتبہ کریں۔ رات کو سونے کیلئے لیٹیں توآنکھیں بند کرکے تصور کریں کہ بند آنکھوں سے آپ آسمان کو دیکھ رہے ہیں۔ اس تصور کو قائم رکھیں یہاں تک کہ نیند آجائے۔ اول الذکر عمل کو تین ہفتے اور آسمان کے تصور پر کم ازکم دو ماہ تک عمل کیا جائے انشاء اللہ جن ذہنی الجھنوں کا آپ نے تذکرہ کیا ہے وہ بہت جلد دور ہوجائیں گی۔
شدید خوف
غیر اہم اور اہم خیالات ذہنی الجھن بن جاتے ہیں پوری رات انہی خیالات میں کروٹیں بدل کر گزار دیتا ہوں‘ نیند آنکھوں سے کوسوں دور رہتی ہے‘ روز بروز قلبی اورجسمانی طور پر انحطاط سے دوچار ہوں۔ خوف کی یہ حالت ہے کہ قبرستان کے پاس سے گزرتے ہوئے دل تیز دھڑکنے لگتا ہے اور حلق میں کانٹے پڑجاتے ہیں محسوس ہوتا ہے کہ میرا کوئی واقف اس جگہ دفن ہے اور میں بھی جلد اس جگہ آنے والا ہوں۔ مختصر کہ ذہنی پریشانی اور جسمانی کمزوری کی منہ بولتی تصویر بن گیا ہوں امید کہ رہنمائی اور مشورے سے نوازیں گے۔(شفیق اکرم‘ راجن پور)
مشورہ: آپ پانچ وقت نماز کی پابندی لازمی کریں اور ہرنماز کے بعد ایک تسبیح استغفار اور ایک تسبیح درود شریف کی لازمی پڑھیں اور دیگر اوقات میں زیادہ سے زیادہ یَااَللہُ یَارَحْمٰنُ کا ورد کرتے رہا کریں۔ انشاء اللہ بہت جلد آپ کی یہ کیفیت ٹھیک ہوجائے گی۔
ناکامی ہی ناکامی
میں ایک دینی ادارے میں درس و تدریس کا کام کرتی ہوں‘ نماز کی پوری طرح پابند ہوں‘ لیکن مجھ مین اتنی صلاحیت اور طاقت نہیں کہ خواتین کے سامنے کھڑے ہوکر تقریر کرسکوں یا دین کی باتیں انہیں بتاسکوں۔ تقریر کرتے ہوئے دل میں کچھ ہوتا ہے اور زبان سے کچھ اور نکلتا ہے۔ الفاظ پر کنٹرول کھو بیٹھتی ہوں۔ گھبراہٹ اور پریشانی میں کانپنے لگ جاتی ہوں۔ کسی پر میرا اثر اور رعب طاری نہیں ہوتا۔ میری طبیعت تیزی اور چستی سے بھی محروم ہے جس سے بھی دوستی ہوتی ہے وہ مجھ سے دور ہوجاتی ہے۔ بہت کچھ بننے کا ارادہ رکھتی ہوں لیکن ناکامی کے سوا کچھ ہاتھ نہیں آتا۔ (ثمینہ‘ کراچی)
جواب: رات کو سونے کیلئے لیٹیں تو وضو کرلیں۔ پشت کے بل لیٹ کر آنکھیں بند کرلیں اور اندازاً پانچ منٹ تک اس آیت کریمہ کو ذہن میں پڑھتی رہیں۔ انما امرہ (سے لے کر ) لہ کن فیکون تک۔ (سورۂ یٰسین) بعدازاں یہ تصور کریں کہ بند آنکھوںکے سامنے ایک سیاہ رنگ کا پردہ ہے اس پردے پر تصور کی قوت سے نورانی حروف میں بار بار یَافَتَّاحُ لکھتی رہیں۔ جس طرح قلم الفاظ لکھتا ہے اسی طرز پر ذہن کی قوت سے اسم یَافَتَّاحُ کو لکھتی رہیں۔ اندازاً دس منٹ کے عمل کے بعد سوجائیں۔ پہلے سات دن یہ عمل کرکے نتائج ملاحظہ کریں پھر مزید سات دن یہ عمل کریں۔ اگر ضرورت محسوس ہو تو دنوں کی تعداد بڑھا کر اکیس دن کردی جائے۔ اس عمل کے نتائج سے بذریعہ خط راقم کو مطلع کریں۔ انشاء اللہ تمام معاملات میں آپ کی خوابیدہ قوتیں متحرک ہوجائیں گی۔ تاہم چند باتیں مدنظر رکھیں۔ کسی پر رعب ڈالنے یا اثر ڈالنے کا خیال دل میں نہ لائیں جو باتیں آپ کہنا چاہتی ہوں ان کا مجموعی خلاصہ ذہن میں رکھیں اور ٹھہر ٹھہر کر اطمینان کے ساتھ بیان کریں۔
والد صاحب کا مسئلہ
والد صاحب کو عرصہ دو سال سے دورہ سا پڑتا ہے‘ اچانک کھڑے یا بیٹھے گرجاتے ہیں اور اس طرح تڑپنے لگتے ہیں جیسے کوئی پرندہ پھڑپھڑاتا ہے ایک گھنٹہ تک غنودگی کی حالت میں رہنے کے بعد ہوش میں آتے ہیں اور اس وقت ان کا رنگ زرد ہوتا ہے اور شدید کمزوری ہوجاتی ہے حتیٰ الوسع علاج اور دیگر طریقے آزمائے ہیں لیکن حالت بدستور وہی ہے۔ (ابراراحمد‘ لاہور)
جواب: کسی ماہر امراض و دماغ اعصاب سے معائنہ کرانا ضروری ہے تاکہ دورے کی وجہ سامنے آسکے۔ بعدازاں علاج کارگر ہوگا صبح پانی پر یَارَبَّ الرَّحِیْمْ سو مرتبہ دم کرکے پلائیں اور رات کو سونے سے پہلے سر پر تین مرتبہ یَاوَدُوْدُ دم کیا جائے۔ انشاء اللہ مرض کے خاتمے اور صحت میں یہ وظائف ممدومعاون ثابت ہوں گے۔
یوں تو میری زبان……!
میں ایک طالب علم ہوں۔ یوں تو میری زبان روانی سے چلتی ہے لیکن مخصوص حروف صحیح تلفظ کے ساتھ بولنے سے قاصر رہتا ہوں۔ بہت کوشش کرتا ہوں کہ زبان ٹھیک ہوجائے لیکن کامیاب نہیں ہوتا۔ اچانک غلط تلفظ ادا کرنے سے صورتحال مضحکہ خیز ہوجاتی ہے اور لوگوں کے سامنے شرمندگی اٹھانی پڑتی ہے۔ یہی وجہ ہے کہ رشتہ داروں اور دوستوں سے حتی الامکان دور رہنے کی کوشش کرتا ہوں۔ (روشن‘ راولپنڈی)
جواب: اگر زبان کی ساخت میں کوئی مسئلہ نہیں ہے تو مندرجہ ذیل عمل سے انشاء اللہ ضرور فائدہ ہوگا۔ ایک مرتبہ کھٰیٰعصٓ پڑھ کر ایک کاغذ پر دم کریں اور کاغذ پر بھی حرف لکھ دیں۔ اس کاغذ کو اپنے تکیے کے اندر رکھ دیں۔ خیال رہے کہ آپ کا تکیہ کوئی دوسرا شخص استعمال نہ کرے۔ رات کو سوتے وقت بھی صرف ذہن میں آہستگی سے گیارہ بار دہرائیں اور سوجائیں جب بھی بات کریں رک کر اور آہستگی کے ساتھ کریں تاکہ زبان کی حرکت پر زیادہ سے زیادہ کنٹرول حاصل رہے۔
دماغ جکڑا ہوا ہے
جسمانی پر طور پر کوئی شکایت نہیں لیکن ذہنی یکسوئی ختم ہوکر رہ گئی ہے۔ یوں لگتا ہے جیسے کسی غیبی طاقت نے دماغ کو جکڑ رکھا ہے۔ گھر میں نہ ختم ہونے والے مسائل کا سلسلہ جاری ہے۔ خاندانی رنجشیں بڑھتی جارہی ہیں۔ گھر کا ماحول ایسا ہے کہ بعض اوقات گھر چھوڑ دینے کا خیال آجاتا ہے۔ ان حالات کو مدنظر رکھتے ہوئے اپنی رائے اور مشورے سے نوازیں۔ (طاہرہ وقاص‘ جہلم)
جواب: آدمی اپنے گردوپیش کو بالکل نہیں بدل سکتا اور نہ قطعی طور پر اس سے لاتعلق ہوسکتا ہے۔ تاہم ان حالات میں اسے چاہیے کہ خود کو تفکرات سے اس طرح دور رکھے کہ اس کی ذہنی توانائی کم سے کم ضائع ہو۔ اس کے ساتھ ساتھ یَاحَیُّ یَاقَیُّومُ کا ورد ہر اعتبار سے بہتر ثابت ہوگا۔ زیادہ سے زیادہ پڑھتی رہا کریں۔
عجیب کشمکش
ہمہ وقت دماغی الجھن میں مبتلا رہتی ہوں۔ اچانک مایوسی اور افسردگی طاری ہوجاتی ہے دل نہ پڑھنے کو چاہتا ہے اور نہ کسی کام کی امنگ باقی رہتی ہے کسی سے بات کرنا نہایت برا محسوس ہوتا ہے۔ اکثر مستقبل کے بارے میں سوچتی ہوں اور شدید ناامیدی گھیرلیتی ہے۔ اچانک رونا آجاتا ہے پہلے معمول کی تمام سرگرمیوں میں حصہ لیتی تھی لیکن اب حال برعکس ہے کبھی کوئی ارادہ کرتی ہوں اور کبھی دوسرا منصوبہ دل میں جگہ کرلیتا ہے۔ غرض عجیب کشمکش میں دماغ گرفتار رہتا ہے۔ (غزل‘لاہور)
جواب: انسان کی بنیاد وہم اور یقین پر ہے۔ مذہب کی اصطلاح میں اسی کو شک اور ایمان کہا گیا ہے۔ اللہ تعالیٰ دماغ میں شک کو جگہ دینے سے منع فرماتے ہیں اور ذہن میں یقین کو پختہ کرنے کا حکم دیتے ہیں۔ یہی شک اور یقین ہے جو دماغی خلیوں میں ہمہ وقت عمل کرتا رہتا ہے جس قدر شک کی زیادتی ہوگی اسی ہی قدر دماغی خلیوں میں ٹوٹ پھوٹ واقع ہوگی۔ انہی دماغی خلیات کے زیراثر تمام اعصاب کام کرتے ہیں اور اعصاب کی تحریکات ہی انسانی زندگی ہے۔ جب ذہن پر شک کا غلبہ ہوتا ہے تو آدمی مفروضہ خیالات کو حقیقت کا درجہ دینے لگتا ہے اور یہ خیالات ایسے ہوتے ہیں جن میں شکست و ریخت ہوتی ہے مثلاً عمل کے ضائع ہونے کا خدشہ‘ مستقبل کے متعلق ناامیدی وغیرہ۔ ان تمام باتوں کو بیان کرنے کا مقصد یہ ہے کہ آپ اپنے خیالات میں شک کو زیادہ سے زیادہ دور کرتے ہوئے یقین کو بیدار کریں مستقبل کے متعلق اندیشوں کو قطعی طور پر ذہن سے دور کردیں۔ کسی ایک کام کا ارادہ کریں تو اس کے علاوہ کسی دوسری طرف دھیان نہ دیں۔ نماز کی پابندی کریں اور نمازفجر اور نمازعشاء کے بعد اکیس اکیس مرتبہ سورۂ فاتحہ پڑھ کر اپنے قلب پر دم کردیا کریں انشاء اللہ بہت جلد دماغی کشمکش ختم ہوجائے گی۔
ایک وہم……
میری عمر سولہ سال ہے اور جماعت دہم کا طالب علم ہوں‘ حالت ایسی ہے کہ کچھ نہیں کرسکتا‘ تمام جسم درد کرتا ہے اور جسم میرے ارادوں کا ساتھ نہیں دیتا ہر وقت اپنی بیماری کے متعلق سوچتا رہتا ہوں‘ خیال آتا ہے کہ شاید اب زندگی سے ہاتھ دھو بیٹھوں گا ایک وہم میرے دماغ سے چمٹ کر رہ گیا ہے دوست میرا مذاق اڑاتے ہیں جسم کی ہڈیاں نظر آتی ہیں دل گھبراتا ہے اور ہاتھ پاؤں ٹھنڈے ہوجاتے ہیں علاج کرارہا ہوں۔ (عثمان فاروق‘ ملتان)
جواب: رات کو ایک وقت مقرر کرکے بیٹھ جائیں پانچ منٹ تک ان الفاظ کو پڑھیں اَلْعَظْمَۃُ لِلہِ مَافِی السَّمٰوَاتِ بعدازاں دس منٹ تک خاموش بیٹھے رہیں اس عمل کو کم از کم دوماہ تک کیا جائے۔ علی الصبح پانی پر اکتالیس بار الٰرٰ تِلْکَ اٰیٰتُ الْکِتَابِ الْمُبِیْنِ اَلرَّحِیْمْ اَلرَّحِیْمْ اَلرَّحِیْمْ یَااَللہُ یَاحَفِیْظُ دم کرکے پی لیا کریں۔ یہ عمل نوے دن تک کیا جائے علاج اور وظیفہ روحانی سے انشاء اللہ آپ کی ذہنی و جسمانی صحت بحال ہوجائے گی۔
ڈراؤنے خواب
بچی کی پیدائش کے ایک ماہ بعد پڑوس میں کسی کے انتقال پر تعزیت کیلئے چلی گئی اس کے بعد سے میری حالت بہت خراب ہے‘ رات کو نیند نہیں آتی اور ڈراؤنے خواب دکھائی دیتے ہیں‘ ہروقت یہ خیال رہتا ہے کہ میں مرنے والی ہوں‘ کھانا کھانے کو بالکل دل نہیں چاہتا‘ بہت کمزور ہوگئی ہوں‘ گھر کا نظام تہہ وبالا ہوگیا ہے شوہر میری طرف سے بہت پریشان رہتے ہیں۔(عائشہ خان‘ لاہور)
جواب: کسی ماہر امراض نسواں سے اپنا معائنہ کرائیں اور ان کی ہدایت پر عمل کریں‘ صبح اور رات کو پانی پر یَااَللہُ یَارَحِیْمُ یَامُرِیْدُ سو سو مرتبہ دم کرکے پیا کریں انشاء اللہ تمام حالات و کیفیات ختم ہوجائیں گی۔
توانائی سے محروم
دو سال سے ذہنی دباؤ میں مبتلا ہوں۔ خیالات میں ثقل غالب رہتا ہے۔ خاص طور پر صبح بیدار ہونے کے بعد شدید ذہنی کوفت کا سامنا کرنا پڑتا ہے۔ ذہنی و جسمانی توانائی کے زیاں سے صحت دن بدن گرتی جارہی ہے۔ جسم میں خون کی کمی ہے اور جسم توانائی سے محروم دکھائی دیتا ہے۔ دوست میرا مذاق اڑاتے ہیں جس سے میری ذہنی اذیت میں مزید اضافہ ہوجاتا ہے۔ (مختار احمد‘ بہاولپور)
جواب: ہر نماز کے بعد گیارہ مرتبہ یَاسَلَامُ اَلْمُھَیْمِنُ اَلْقُدُّوْسُ پڑھ کر ہاتھوں پر دم کریں اور ہاتھ چہرے پر پھیر لیا کریں۔ اس ورد کو آنکھیں بند کرکے پڑھیں اور ذہن میں الفاظ کو واضح اور الگ الگ دہرائیں۔ نمازفجر کے بعد کسی کھلی جگہ چہل قدمی کریں۔ ذہن کو تمام خیالات سے خالی کرکے آہستگی کے ساتھ سانس اندر لیں اور باہر نکالیں۔ اس عمل کو مستقل کرتے ہوئے ذہن میں  یَاحَفِیْظُکا ورد جاری رکھیں۔ بعدازاں پانی پر اکیس مرتبہ الٰرٰ تِلْکَ اٰیٰتُ الْکِتَابِ الْمُبِیْنِ اَلرَّحِیْمْ اَلرَّحِیْمْ اَلرَّحِیْمْ یَااَللہُ یَاحَفِیْظُ  دم کرکے پی لیا کریں۔

مرد عورت کی خوشگوار ازدواجی زندگی کا راز

ازدواجی تعلقات کی ابتری سے دنیا کا ہر حصہ دوچار ہے اور طلاقوں کی شرح مغرب میں ہی نہیں اب مشرق میں بھی بڑھ رہی ہے جہاں اسے معیوب سمجھا جاتا تھا۔ بہت سے لوگوں کیلئے یہ ایک حیران کن خبر ہوگی کہ متحدہ عرب امارات میں طلاقوں کا رجحان خطرناک حدوں کو چھونے لگا تھا جہاں ہر نو جوڑوں میں سے ایک کی علیحدگی ایک لازمی امر ہوچکی تھی مگر وہاں اس اہم مسئلے پر فوری طور پر توجہ دے کر ایسے اقدامات کیے گئے کہ علیحدگی کی شرح میں نمایاں کمی واقع ہوئی جس کا سبب محض چند ایسی ہدایات تھیں جن پر عمل کرکے شادی شدہ جوڑے ایک دوسرے کو سمجھنے اور آپس کے جذبات کو جاننے میں کامیاب ہوکر اپنی ازدواجی زندگی کو پرمسرت بناسکتے ہیں مزے کی بات یہ ہے کہ تمام تر ہدایات مشورے اور تجاویز عام زندگی سے متعلق ہیں جن پر ذرا سی توجہ دے کر بہ آسانی عمل کیا جاسکتا ہے ان تجاویز کو دیکھیں اور پڑھیں تو ممکن ہے کہ آپ کو بھی ان سے کچھ مدد مل جائے۔
مردوں کیلیے ہدایات
محترم شوہر…! آپ کی بیوی حیاتیات کے اعتبار سے ایک مختلف انسان ہے۔ اس کی شخصیت کو سمجھنے اور اس کا اعتماد بڑھانے کیلئے ہم نے یہاں کچھ تجاویز پیش کی ہیں:۔ ٭ کبھی اس بات کی توقع مت کریں کہ وہ اس رویہ کا مظاہرہ کرے جس کا آپ خود کرتے ہیں کیونکہ وہ آپ سے مختلف ہے۔ ٭ اس کی شکایات کو نظر انداز نہ کریں کہ وہ انتہا درجے پر جاکر جذبات سپورٹ کی توقع کرتی ہے۔ ٭ عورت کبھی بخیل شخص کو پسند نہیں کرتی لہٰذا اسے مختلف اوقات میں تحفے تحائف اور باہر جانے کی دعوت دیتے رہا کریں۔ ٭ عورت کو اپنے والدین کے یہاں جانے کی اجازت ہونی چاہیے۔ ایسے اوقات میں معاندانہ رویہ نہ اپنائیں اور نہ یہ ظاہر کریں کہ آپ اس کے پیار سے محروم ہورہے ہیں۔ ٭ اس کے ساتھ بھی فلرٹ کی اہمیت کو فراموش نہ کریں اور بستر میں اس کی خواہشات کو آسودگی بخشیں۔ ٭ عورت تنقید کو قطعی پسند نہیں کرتی لہٰذا زبانی جنگ میں کبھی بھی کھلے عام اس کی خامیوں و کمزوریوں پر اظہار خیال نہ کریں۔ ٭ مسائل کے بہ آسانی حل کی کبھی توقع نہ کریں کیونکہ وہ جذبوں سے سرشاری کے باعث ہر چیز کا منطقی حل چاہتی ہے۔ ٭اس امر میں مداخلت نہ کریں کہ وہ گھر کیسے چلارہی ہے اس کے بجائے اسے اعتماد دیتے ہوئے یہ احساس دلائیں کہ وہی اس سلطنت کی ملکہ ہے۔٭ اس کی نسوانیت کو اطمینان بخشنے کیلئے اس کے اور اس کے کپڑوں کی تعریف کرتے رہیں نیز میک اپ ‘کوکنگ اورگھر کی سجاوٹ کو بھی سراہیں۔ ٭ اس بات کو بھی مدنظر رکھیں کہ بچے کی پیدائش کے دنوں میں عورت کا موڈ اچانک بدل جاتا ہے جبکہ حمل یا حیض میں بھی یہی کیفیت ہوتی ہے۔ ٭صرف اس وجہ سے بیوی سے دور نہ رہیں کہ وہ محض بولنے یا سننے کو پسند کرتی ہے۔ ٭عورت قدرتی طور پر حساس ہوتی ہے جو زخموں کو نظرانداز نہیں کرسکتی‘ اس کی نقل اتارنے‘ مذاق اڑانے یا احساسات کو کچلنے سے گریز کریں۔ ٭ہرعورت کو ایک ایسے مرد کی ضرورت ہوتی ہے جو اس پر اعتماد اور بھروسہ کرتا ہو وہ خود کو خوف وفکر سے آزاد اور محفوظ سمجھے اسے قطعی مایوس نہ کریں۔ ٭عورت کے پیار اور توجہ کی خاطر کبھی اپنے فرائض و ذمہ داریوں کو نظرانداز نہ کریں۔ ٭مسائل کے حل کیلئے اس کی تجویز کو حقیر نہ سمجھیں کیونکہ وہ اسے بے عزتی سمجھے گی اور پوری فیملی میدان جنگ بن جائے گی۔
عورتوں کیلیے ہدایات
محترم بیوی…! اپنے شوہر کی فطرت پر توجہ دیں اور زندگی میں حاصل شدہ خوشیوں اور آسودگی کے تناظر میں اس کی شخصیت کو سمجھیں اور براہ کرم ان تجاویز کو قابل غور رکھیں۔ ٭اپنے آپ سے اس کا موازنہ نہیں کریں کہ وہ مرد ہونے کے باعث آپ سے بالکل مختلف ہے جس کی سوچ اور سمجھ کا انداز بھی مختلف ہے۔ ٭اس کی تنہائی میں اس وقت قطعی مخل نہ ہوں جب وہ اپنے طور پر مسائل کا حل نکالنے کی کوشش کررہا ہو کیونکہ ایسی کوشش اسے جھنجھلاہٹ میں مبتلا کردے گی۔ ٭اپنے مرد کی بے رحمانہ طبیعت کو ہرگز مت ابھاریں کیونکہ جب وہ نروس ہوگا تو فوری طورپر صبر کا دامن ہاتھ سے چھوڑ سکتا ہے۔ ٭کبھی یہ توقع مت کریںکہ وہ کسی کام کو اسی طرح کرے گا جیسے کہ آپ پسند کررہی ہیں کیونکہ وہ آپ کی طرح نہیں سوچتا ہے۔ ٭اپنی سوچوں کو اس پر مت تھوپیں کیونکہ یہ احساس ہوتے ہی کہ آپ اس پر حکمرانی کی کوشش کررہی ہیں وہ طیش میں آجائے گا۔ ٭مرد عموماً باتونی عورتوں کو پسند نہیں کرتے ہیں‘ زیادہ بول کر اسے دق نہ کریں کہ یہ چیز اسے کنفیوژ کرکے رکھ دے گی۔ ٭اس کی جانب سے معذرت کی توقع نہ کریں کہ مرد معافی مانگنا پسند نہیں کرتے ہیں اور کسی صورت میں ان کی یہ خواہش ہوئی کہ شرمندگی کا اظہار کریں تو وہ براہ راست ایسا نہیں کریں گے۔ ٭اسے ایسی حالت میں نہ چھوڑیں کہ اس کی ضرورت نہیں رہی ہے اس طرح آپ اس کی نرمی کے ساتھ محبت اور توجہ کیلئے کبھی نہیں ترسیں گی۔ ٭کوئی ایسی بات نہ کریں جو کہ اسے پسند نہ ہو کیونکہ ایسا کرتے ہوئے اس کے احساسات کو زد پہنچے گی اور اس کا موڈ تباہ ہوجائے گا۔ ٭اگر آپ اسے کھونا نہیں چاہتیں تو اس پریشانی میں مبتلا نہ ہوں کہ وہ آپ اور بچوں کیلئے کیا کررہا ہے۔ ٭فیملی اور دوستوں کے سامنے شوہر پر تنقید مت کریںکیونکہ وہ یہ محسوس کرے گا کہ آپ اس کی مردانگی کو چیلنج کررہی ہیں۔ ٭مسلسل سوالات کرکے اسے دق میں مبتلا نہ کریں کہ وہ پرندے کی طرح آزاد رہنا چاہتا ہے۔ ٭خلوت کے لمحات میں اسے بے خواہش ہونے کا احساس نہ دلائیں کیونکہ ایسی صورت میں وہ اسی آسودگی کیلئے کوئی اور راستہ تلاش کرلے گا۔ ٭اپنے شوہر کے رازوں کو خود تک محدود رکھیں کیونکہ وہ قدرتی طور پر رازوں کی حفاظت کو پسند کرتا ہے۔ ٭ مسلسل تقاضے کرنے والی بیوی مت بنیں کہ اسے پرسکون اور قانع عورت پسند ہے۔ ٭اس کی محبت اور احترام سے محروم نہ ہونے کیلئے اس پر کبھی یہ ظاہر نہ کریںکہ آپ اس سے بہتر ہیں۔ ٭اس پر اپنے پیار کو نچھاور کردیں اور توجہ دیں کیونکہ یہی اس کی آرزؤں کی تکمیل ہے۔ ٭کسی مرد کی فیاضی اس کے ردعمل پر منطبق ہوتی ہے لہٰذا اس کی جانب سے پہل کرنے کی توقع مت کریں بلکہ مناسب وقت آنے دیں۔ ٭ بچوں کو شوہر سے بڑھ کر توجہ نہ دیں اور نہ ہی نرمی برتیںکیونکہ جب وہ گھر پر ہو تو اسے آپ کی توجہ کا مرکز ہونا چاہیے۔

عضو اپنی اپنی جگہ اہم

ویسے تو انسان کا پورا جسم (بلکہ ہر عضو) قدرت کا ایک عظیم معجزہ ہے۔ ہر عضو اپنی اپنی جگہ اہم اور نہایت قیمتی ہے۔ مگر کچھ عضو ایسے ہیں جن کی اہمیت بہت زیادہ ہے کیونکہ مختلف دوسرے کام کرنے کیلئے ان پر انحصار کرنا پڑتا ہے۔ ایسا ہی ایک عضو آنکھیں ہیں۔آنکھیں اللہ تعالیٰ کی عطا کردہ نعمتوں میں سے ایک بہت ہی قیمتی نعمت ہے۔ مگر دیکھنے میں آیا ہے کہ ہم ان کی قدر اس طرح نہیں کرتے جتنی کرنی چاہیے۔ خاص کر اس وقت دل بہت دکھتا ہے جب چار یا پانچ سال کے بچے بچیاں آنکھوں پر عینک لگائے نظر آتی ہیں جب اس ننھی سی عمر میں ان کایہ حال ہے تو آگے جاکر کیا ہوگا اللہ ہی بہتر جانتا ہے۔آنکھوں کی حفاظت اور صفائی کے سلسلہ میں چند گزارشات حسب ذیل ہیں:۔
1۔ آنکھوں کی خرابی (خاص کر بچوں میں) میں ٹی وی کا بڑا دخل ہے۔ ٹی وی بالکل نہیں دیکھنا چاہیے۔2۔ کمپیوٹر کی سکرین کو مناسب فاصلے پر رکھ کر کمپیوٹر استعمال کرنا چاہیے۔
3۔کمپیوٹر کو زیادہ عرصہ دیر تک لگاتار استعمال نہیں کرنا چاہیے۔ 4۔ کچھ لوگ لگاتار 10,10گھنٹے کمپیوٹر پر کام کرتے ہیں‘ایسا کرنا غلط ہے گاہے بگاہے ادھر اُدھر دیکھنا چاہیے تاکہ آنکھوں پر مسلسل بوجھ نہ پڑے۔
5۔ کھانا کھاتے وقتمطالعہ کرنے سے گریز کرنا چاہیے تاکہ آپ کا دماغ کھانےا ور اس کے ہضم کرنے کی طرف راغب ہو۔6۔ آنکھوں کو (دن میں کئی بار) تازہ ٹھنڈے پانی سے دھونا چاہیے تاکہ تھکاوٹ دور ہو اور گردوغبار صاف ہوجائے۔7۔ لکھائی پڑھائی کاکام لیٹ کرنہیں کرنا چاہیے اس سے آنکھوں اور دماغ پر بوجھ پڑتا ہے۔
8۔ بہتر ہےلکھائی پڑھائی کاکام کھلی اور ہوا دار جگہ اور قدرتی روشنی یعنی سورج اور دن کی روشنی میں کرنا چاہیے۔
9۔ آنکھوں اور دماغ کی طاقت کیلئے مندرجہ ذیل نسخہ بہت ہی مفید ہے۔ میں گزشتہ 50 سال سے اسے استعمال کررہا ہوں۔ بفضل تعالیٰ کسی قسم کی عینک کی ضرورت نہیں پڑی۔ 
ھوالشافی: گری بادام ایک چھٹانک‘ اسطخودوس آدھی چھٹانک‘ دھنیا آدھا چھٹانک‘ خشخاس ایک چھٹانک‘ سونف ایک چھٹانک‘ مصری حسب ضرورت‘ ورق چاندی حسب ضرورت‘ دانہ چھوٹی الائچی حسب ضرورت۔اگر مصری کی بجائے خالص شہد استعمال کرلیں تو یہ نہایت ہی خوش ذائقہ معجون بن جائے گی۔
خوراک: بعد از غذا صبح‘ دوپہر‘ شام ایک چمچہ چائے والا استعمال کریں۔10۔ لکھائی پڑھائی اوردماغی کام کرتے وقت وقفہ وقفہ سے ریسٹ کریں تاکہ صرف شدہ توانائی بحال ہوسکے۔11۔ اس وقفے کے دوران درج ذیل کام کرنا بہت ہی مفید ہیں:۔لمبے لمبے سانس لینا۔ کوئی مائع چیز۔۔۔ پانی وغیرہ استعمال کرنا۔ آنکھوں‘ سر کا مساج کرنا‘ آسمان کی طرف نیلی روشنی کو دیکھنا۔ پانی کے چھینٹے مارنا۔
12۔ آنکھوں کو گردوغبار‘ دھویں‘ تیز روشنی‘ زہریلی گیسوں اور دیگر مضراثرات چیزوں سے بچانا چاہیے۔
قوت بصارت میں اضافہ
1۔غسل کرنے سے پہلے ہمیشہ اپنے پاؤں کے انگوٹھوں پر سرسوں کا تیل ملئے۔ انشاء اللہ تعالیٰ کبھی نظر کمزور نہ ہوگی چاہے عمر سو سال سے تجاوز کرجائے۔2۔فَکَشَفْنَا عَنْکَ غِطَآءَکَ فَبَصَرُکَ الْیَوْمَ حَدِیْدٌ ﴿قٓ۲۲﴾ترجمہ:تو ہم نے تجھ پر سے پردہ اٹھایا تو آج تیری نگاہ تیز ہے ۔
ہر نماز کے بعدتین بار پڑھ کر انگلی پر پھونک مار کر انگلی آنکھوں پر پھیرلیں۔ انشاء اللہ تعالیٰ موتیا سے شفاء ہوگی۔
3۔سورۂ یٰسین پڑھ کر سرمہ پر دم کریں دم کردہ سرمہ آنکھوں میں لگایا جائے۔ انشاء اللہ تعالیٰ موتیا سے شفا ہوگی۔
4۔فَکَشَفْنَا عَنْکَ غِطَآءَکَ فَبَصَرُکَ الْیَوْمَ حَدِیْدٌ ﴿قٓ۲۲﴾ سات بار درود شریف‘ سات بار مندرجہ بالا آیت اور پھر سات بار درود شریف پڑھ کر دونوں ہاتھوں کے دونوں انگوٹھوں کو پھونکیں پھر دونوں انگوٹھوں کو دونوں آنکھوں پر پھیرلیں۔ انشاء اللہ نور بصرو زوال نظر کیلئے فائدہ مند ہوگا۔
5۔اَللّٰھُمَّ مَتِّعْنِی بِبَصْرِیْ وَاجْعَلْہُ الْوَارِثُ مِنِّی وَاْرِنِیْ فِی الْعَدُوِّ ثَارِیْ وَانْصُرْنِیْ عَلٰی مَنْ ظَلَمْنِیْ۔ ترجمہ: اے اللہ میری بینائی میں مجھے نفع پہنچائیے اور مرتے دم تک اسے باقی رکھیے اور دشمن میں میرا انتقام مجھے دکھائیے اور جس نے مجھ پر ظلم کیا اس کے مقابلے میں میری مدد فرمائیے۔مندرجہ بالا دعا سے انشاء اللہ ساری عمر بینائی قائم رہے گی اور آنکھ ہر بیماری اور تکلیف سے محفوظ رہے گی۔6۔ یَاشَکُوْرُ۔ روزانہ 41 بار بعد نماز فجر پڑھ کر پانی دم کرکے آنکھوں پر چھینٹے ماریں۔ آنکھوں کی تکالیف دور اور بصارت میں اضافہ ہوگا۔ 7۔ یَانُوْرُ۔ بعد از ہر نماز 11بار پڑھ کر انگوٹھوں انگلیوں کے پوروں پر دم کرکے آنکھوں پر پھیریں۔8۔یَابَصِیْرُ اسی طرح گیارہ بار پڑھ کر انگوٹھوں یا انگلیوں کے پوروں کو دم کرکے آنکھوں پر پھیریں انشاء اللہ تعالیٰ بہت فائدہ ہوگا۔ 9۔ فَجَعَلْنٰہُ سَمِیْعًۢا بَصِیْرًا ﴿ۚالدھر۲﴾ بعد نمازفجر اور بعد نماز مغرب سات سات بار پڑھ کر (اول وآخر درود ابراہیمی) انگلیوں پر یا انگوٹھوں کے پوروں پر دم کرکے آنکھوں پر ملیں انشاء اللہ بڑھاپے تک بصارت قائم رہے گی۔ 10۔ نظر کی کمزوری اور آنکھوں کی روشنی کیلئے ایک نہایت مفید عمل یہ ہے کہ عشاء کی نماز کے بعد دو رکعت نفل اس طرح پڑھیں کہ الحمدشریف کے بعد ہر رکعت میں سورۂ کوثر پانچ پانچ بار پڑھیں‘ نماز کے بعد پھر یہ دعا تین بار پڑھیں۔اَللّٰھُمَّ عَافِنِیْ فِیْ بَدَنِیْ اَللّٰھُمَّ عَافِنِیْ فِیْ سَمْعِیْ اَللّٰھُمَّ عَافِنِیْ فِیْ بَصَرِیْ لَآ اِلٰہَ اِلَّا اَنْتَ۔دعا مذکورہ پڑھنے کے بعد دونوں ہاتھوں کے انگوٹھوں کو دم کرکے آنکھوں پر ملیں۔

ہرلاعلاج مرض سے نجات کی پڑیا

میرا ایک دوست ڈاکٹر جو کہ دل کا ڈاکٹر ہے اس کے پاس ایک مریض جو کہ میانوالی کا ہے آیا وہ گردوں کا مریض تھا اور ہر ہفتہ کے بعد اس کے گردے صاف ہوتے تھے نوبت یہاں تک پہنچ چکی تھی کہ ڈاکٹر نے کہا اس کا گردہ تبدیل کرالیں ٹیلی فون پر اس نے یعنی ڈاکٹر صاحب نے مجھ سے مشورہ کیا میں نے آپ کی بتائی ہوئی دوائی جو کہ شوگر والے مریضوں کو فری دیتا ہوں‘ وہ دوائی میں نے اپنے دوست ڈاکٹر کو دے دی۔ ایک ہفتہ کے بعد ڈاکٹر صاحب نے بتایا کہ مریض کی حالت اب پہلے سے کافی بہتر ہے اور خوشی کی بات یہ کہ ڈائیلاسز بھی نہیں ہورہے ہیں اب تقریباً ڈیڑھ ماہ گزر چکا ہے مریض 50%تندرست ہے اور اس کی صحت بھی کافی بہتر ہے۔
اب یہ عالم ہے کہ آپ کی بتائی ہوئی یہ دوا وہ ڈاکٹر کیپسول میں بھر کر مریضوں کو دیتا ہے اور بہت زیادہ رقم بھی لیتا ہے۔ جب مجھے اس بات کا علم ہوا تو میں نے اس ڈاکٹر کو سختی سے منع کردیا کہ آئندہ جو بھی مریض آئے اسے یہ دوا مفت دیں۔ آپ کی یہ دوائی پتھری‘ بخار‘ ہیپاٹائٹس‘ طاقت خاص‘ جوڑوں کا درد‘ دمہ حتیٰ کہ ہر قسم کے مریض کو دیتا ہوں اور اللہ کے فضل و کرم اور آپ کی دعاؤں سے مریض بالکل ٹھیک ہوجاتا ہے۔ نسخہ مندرجہ ذیل ہے۔
ھوالشافی: تمہ خشک‘ کلونجی‘ گوند کیکر‘ تخم سرس‘ گھٹلی جامن تمام چیزیں 50گرام لینی ہیں۔
طاقت خاص میں کمزوری والے مریضوں کو قسط شیریں 25گرام اس دوا میں شامل کردیتا ہوں۔ معدے کے مریض بھی اس دوا سے شفا یاب ہورہے ہیں۔  آپ کا یہ نسخہ شفاء کی پڑیا ہے۔ میں یہ دوائی ہر ماہ تقریباً 20کلو بنا کر مریضوں میں مفت تقسیم کررہا ہوں اور لوگوں کی لاتعداد بیماریاں ختم ہورہی ہیں۔
جوہرشفاء مدینہ کا انوکھا کمال
(ذکیہ اقتدار‘ بہاولنگر)
فروری کی رات تھی اب لوگ رات کے فنکشن کو ترجیح دیتے ہیں‘ قریبی عزیزوں کی تقریب تھی‘ راقمہ نے بھی دعوت نامہ وصول کیا تو دعوت میںشرکت ضروری تھی‘ میرے پیارے نبی ﷺ کی سنت ہے۔ مغرب کی نماز اطمینان سے ادا کی لیکن عشاء کی نماز جلد ہی ادا کرلی‘ انبیاء علیہ السلام کی بتائی ہوئی دعائیں مانگیں‘ آسانی اور خیریت سے گھر واپسی ہوجائے تو آٹھ بجے جانا ہوا‘ جہاں یہ تقریب ایک وسیع گراؤنڈ میں تھی‘ شامیانے لگائے گئےتھے‘ راقمہ جہاں پر تھی اس طرف کافی سرد ہوائیں تھیں ناک اور منہ کے ذریعے حلق میں ٹھنڈی ہوا یوں داخل ہورہی تھی جیسے تیروں کی بارش۔ اپنے منہ اور ناک کو ہوا سے محفوظ کرتے ہوئے یہ تقریب ختم ہوئی۔ اب واپسی کا مسئلہ تھا گھر پہنچنا تھا تب بارہ بجے سردی پورے عروج پر تھی‘ جونہی شامیانے سے باہر آئے مزید برفانی ہوا پوری قوت کے ساتھ ناک اور منہ میں داخل ہوگئی۔ جونہی گھر میں قدم رکھا سکون کا احساس ہوا۔ عشاء کی نماز پڑھ گئی تھی چائے کی طلب تھی لیکن بنانے کی ہمت نہیں تھی گرم لحاف لیا اور دعائیں پڑھتے‘ اپنے رب سے رازو نیاز کرتے سکون کی وادی میں کھوگئی۔ جلدی ہی دوبارہ آنکھ کھلی تو حلق میں شدید خراشیں تھیں‘ شدید دکھن تھی‘ حلق سے نیچے پانی کی بوند بھی جانے کو تیار نہیں تھی‘ بس جی راقمہ تو یَارَحْمٰنُ‘ یَارَحِیْمُ یَاوَدُوْدُ پڑھتی ہوئی باورچی خانے کی طرف دوڑی‘ دو چمچ جوہرشفاء مدینہ لی‘ بارش کا پانی ہمیشہ محفوظ رکھتی ہوں ایک کپ پانی لیا‘ ایک چمچ بارش کا پانی لیا اور چولہے پر سوس پین رکھا اور آب بارش پانی میں ملایا اور ابلنے رکھ دیا اس میں جوہر شفاء مدینہ شامل کیا پھر گرم گرم گھونٹ گھونٹ کرکے پیا‘ جونہی یہ چائے پیتی گئی حلق یوں صاف ہوتا گیا جیسے کسی نے اس کی صفائی ہاتھ سے کی ہو۔ جیسے ہی آخری گھونٹ ختم ہوا تو گلے کی خراشیں یوں غائب ہوئیں جیسے کبھی یہ تکلیف ہوئی نہ تھی۔ چائے پیتے ہوئے یَاسَلَامُ کا ورد جاری رکھا۔ پھر گردن کی اچھی طرح مالش کی گرم پٹی لی اور اچھی طرح گردن پر لپیٹ لیا۔ لیجئے جی علاج مکمل ہوا۔ ساتھ ہی فجر کی اذان ہوگئی بہت سکون سے نماز ادا کی‘ تسبیحات مکمل کیں‘ آخر میں دعا مانگی فجر کی نماز کے بعد دعاؤں کا مزہ ہی کچھ اور ہوتا ہے۔ لذت اور سکون ملتا ہے۔ میں اور میرے ہمسفر فجر کی نماز کے بعد چائے اکٹھے پیتے ہیں۔ میرے ہمسفر کہتے ہیں کہ فجر کی نماز کا مزہ اور اس کے بعد چائے پینے کا مزہ سارا دن مسرور رکھتا ہے۔ چائے کے ساتھ میں نے اپنے ہمسفر کو جوہرشفاء مدینہ کا کمال بتایا اگر جوہرشفاء مدینہ استعمال نہ کرتی تو ہفتوں کیلئے بستر ہوتا۔ یہ گلے کی خراشیں شدید نزلے کی شکل اختیار کرکے ایک بہت بڑا وبال بن جاتیں۔
عبقری کا قرض: میری عبقری کی قاری بہنوں سے گزارش ہے کہ آپ پر عبقری کا قرض ہے۔ اس پرچے کو شوق سے استعمال کریں۔یہ واحد پرچہ ہے جو بغیر اشتہار اور بہت ہی کم قیمت میں دستیاب ہے۔ عبقری خود اپنی مثال ہے۔ لیکن قارئین پر یہ قرض ہے وہ اس کا قرض لوٹائیں تمام قارئین خاص طور پر خواتین بے حد نسخے جانتی ہیں براہ مہربانی وہ نسخے عبقری کو ارسال کریں یہ ان پر قرض ہے اور قرض کی ادائیگی میں عجلت کرنی چاہیے۔ قارئین سے گزارش ہے وہ عبقری غور سے پڑھا کریں۔ تمام نسخہ جات اس میں ہوتے ہیں۔

میری عمر 20سال ہے

میری عمر 20سال ہے اور میرا مسئلہ یہ ہے کہ مجھے ایک ماہ میں کم از کم تین دفعہ احتلام ہوتا ہے اور بعض اوقات تو ایک ماہ میں پانچ چھ دفعہ بھی ہوجاتا ہے میں نے ایک حکیم صاحب سے ملاقات کی تو انہوں نے بتایا کہ تمہارے معدے میں گرمی ہے پھر میں نے ان سے ایک ماہ دوائی کھائی تو ایک ماہ احتلام نہیں ہوا اس کے بعد دوائی چھوڑ دیں تو پھر یہی صورت حال ہے مہربانی فرما کر مفید طبی مشورہ احتیاطی تدابیر اور غذا کا شیڈول تجویز فرمادیں۔ (محمدعبدالباسط فاروقی‘ بھکر)
مشورہ: آپ صبح کی سیر کو اپنا معمول بنالیں اور نماز کی پابندی لازمی کریں اوراپنی سوچوں کو مثبت رکھیں۔ گرم اور بادی اشیاء سے پرہیز کریں۔ آپ غذا نمبر 1 استعمال کریں۔
جسم سن ہوجاتا ہے
محترم حکیم صاحب! یہ مسئلہ میرے ساتھ تقریباً چار پانچ سال سے ہے۔ میرا مسئلہ یہ ہے کہ کبھی سوتے میں رات کو میری ٹانگ سوجاتی ہے‘ یعنی سن ہوجاتی ہے‘ کبھی کمر اور کبھی بازو سوجاتے ہیں اور اگر اس حالت میں کہ میری ٹانگیں وغیرہ سوجائے تو مجھ سے بستر پرکروٹ بدلنا مشکل ہوجاتا ہے‘ ٹانگوں میں عجیب سی سراسراہٹ سی ہوتی ہے اور اگر اٹھ کر کہیں چل کر جاؤں تو گرپڑتا ہوں۔ کبھی اگر دن میں بھی کسی چیز پر ویسے ہی لیٹ جاؤں‘ ٹیک لگا کر بیٹھوں تو کبھی بازؤں کبھی کمر کبھی ہاتھ ٹانگیں‘ پاؤں سوجاتے ہیں اس کا حل ضرور بتائیے گا۔دوسرا مسئلہ یہ ہے کہ کبھی کبھی کوئی کام کرکے اٹھوں یا ویسے ہی بیٹھا بیٹھا اٹھوں تو اچانک آنکھوں کے آگے کچھ منٹ کیلئے اندھیرا چھانے کے ساتھ سر عجیب طرح سے چکراتا ہے۔(عبدالغفار‘ نواں شہرایبٹ آباد)
جواب:آپ لبوب کبیر استعمال کریں اور صبح کی سیر کو اپنا معمول بنائیں۔بکرے کا گوشت چپاتی کے ساتھ کھائیں۔آپ غذا نمبر 2 استعمال کریں۔
حفاظ کو گلے کی شکایت
محترم حکیم صاحب! رمضان المبارک کی آمد آمد ہے اور میرا مسئلہ یہ ہے کہ میں رمضان المبارک میں مقامی مسجد میں تراویح پڑھاتا ہوں اور اس وجہ سے قرآن سناتے ہوئے میرا گلا بیٹھ جاتا ہےاور تقریباً پورا ماہ میں گلے کی وجہ سے بڑا پریشان رہتا ہوں‘ سارا دن تیاری کے دوران اور رات کو تراویح سناتے ہوئے گلے میں سخت خراش محسوس ہوتی ہے۔   (حافظ شاکر‘ لاہور)
مشورہ: رمضان المبارک کا بابرکت مہینہ ہماری زندگی کے ساتھ رواں دواں ہے۔ یہ ہماری خوش نصیبی ہے کہ آپ اور ہم اس مبارک مہینے سے لطف اندوز ہورہے ہیں۔ ورنہ کتنے ایسے لوگ ہیں جو پچھلے برس ہمارے درمیان موجود تھےا ور اب ہمارے درمیان نہیں۔ اس سال بھی نماز تراویح کا اہتمام ہورہا ہےآپ کی طرح کئی حفاظ کرام ہونگے جو اپنے گلے کی وجہ سے پریشان ہوں گے۔بالکل پریشانی کی بات نہیں ہے بس اتنی احتیاط کریں کہ ٹھنڈا پانی‘ دہی اوردوسری کھٹائی والی چیزیں استعمال نہ کریں۔ رات سونے سے قبل نیم گرم پانی میں ایک چھوٹا ٹکڑا پھٹکڑی کا ملالیں۔ حل ہونے پراس سے غرارے کرلیں اور صرف ایک خوراک ارجنٹم میٹ (ARG.MET30) ایک چمچہ پانی میں پانچ قطرے ملا کر استعمال کریں۔ا نشاء اللہ آپ آواز اور گلے سے پریشان نہیں ہونگے۔ اگر آواز زیادہ بیٹھ رہی ہو تو کوکا (COCCA. 30) کی دو تین خوراکیں ایک گھنٹہ کے وقفہ سے مندرجہ بالا طریقہ کے مطابق استعمال کریں۔
کئی ایسے حفاظ کرام بھی ہونگے جن کا یہ پہلا موقع ہوگا پڑھنے یا سننے کا‘ ہوسکتا ہے شروع میں تھوڑی بہت گھبراہٹ ہو‘ آواز میں لغزش نمایاں ہو۔ پڑھنے یا سننے کی وجہ سے کپکپاہٹ ہو۔ تو ایسے حفاظ کرام کیلئے میرا مؤدبانہ مشورہ ہے کہ دو چار دن آپ دن میں ایک آدھ پارے کی تلاوت آئینہ کے سامنے کھڑے ہوکر ضرور کریں۔ اس عمل سے آپ میں انشاء اللہ خود اعتمادی پیدا ہوگی۔
شروع کے روزوں میں عام طور پر زیادہ کھانے کی بنا پر عجیب سستی‘ بھاری پن ہوجاتا ہے جسے عرف عام میں کہا جاتا ہے کہ پیٹ صحیح نہیں ہے‘ اگر ہاضمے کیلئے کولڈ ڈرنک کو استعمال کریں گے تو خدشہ ہے کہ گلا متاثر نہ ہوجائے۔ اس لیے بہتر ہے کہ ہومیو دوانکس وامیکا30۔
NUX. VOMICA۔ لکھی گئی ترکیب سے استعمال کریں۔آپ سے التماس ہے کہ مجھ نا چیز کو بھی اپنی دعاؤں میں ضرور یاد رکھیں۔غذا نمبر 1استعمال کریں۔
پیٹ میں درد
تقریباً ایک سال سے پیٹ کے مرض میں مبتلا ہوں ناف کے دائیں اور بائیں جانب دو یا تین دن بہت شدید درد رہتا ہے۔ بہت علاج کرایا فائدے کے بجائے نقصان ہوا۔ ڈاکٹر کہتے ہیں یہ گیس ہے‘ بدہضمی بھی ہے‘ کھانا ہضم نہیں ہوتا‘ حلق میں اٹکا رہتا ہے جس سے پیٹ میں درد ہوتا ہے اگر کھالوں تو دو گھنٹے بعد الٹی ہوجاتی ہے۔ (قیصر‘ کراچی)
مشورہ: غذا کے بعد دونوں وقت جوارش کمونی چھ گرام ہمراہ عرق بادیان دو اونس کھائیں۔ غذا شدید بھوک پر کھائیں۔ دو غذاؤں کے درمیان کچھ نہ کھائیں پئیں۔غذا نمبر 3استعمال کریں۔
چہرے پر بال
میری عمر تقریباً 32 سال ہے میرے چہرے پر فالتو بال ہیں علاج کافی کروایا ہے وقتی طور پر فائدہ بھی ہوا مگر دوبارہ اس سے بھی گھنے اور زائد بال نکل گئے اب صورتحال یہ ہے کہ قینچی سے کاٹنے پڑتے ہیں جس سے بہت پریشان ہوں۔ (مہناز‘مظفرآباد)
مشورہ: آپ پہلے اپنے ایام کی بے قاعدگی کو دور کریں اس کیلئے کسی مستند ادارے کی ادویات کچھ عرصہ استعمال کریں۔ اس کے ساتھ کسی اچھی سمجھدار بیوٹیشن سے مشورہ کریں۔آپ غذا نمبر 1استعمال کریں۔
رنگ کالا ہوچکا ہے
میری عمر اٹھارہ سال ہے پہلے میرا چہرہ بالکل صاف تھا لیکن اب کچھ ماہ سے میرے چہرے پر سرخ دانے ہیں اور ان میں پانی بھر آتا ہے۔ جلد چکنی ہے جس کی بناء پر مجھے بہت عجیب سا محسوس ہوتا ہے اور ان دانوں کی وجہ سے درد بھی ہوتا ہے۔ رنگ بھی کافی کالا ہوچکا ہے۔ (ابراہیم‘ لاہور)
مشورہ:شربت عناب ایک اونس ایک کپ پانی میں حل کرکے صبح و شام پئیں۔ گرم غذاؤں سے پرہیز کریں۔ صرف دو ہفتے کے بعد دوبارہ لکھیں۔غذا نمبر 1استعمال کریں۔
پیٹ بڑھ رہا ہے
میں پچھلے بیس سال سے ذیابیطس کی مریضہ ہوں‘ انسولین لیتی ہوں جس کی وجہ سے شوگر کنٹرول میں ہے میرا مسئلہ یہ ہے کہ پچھلے کچھ مہینوں سے میرے پاؤں کے ٹخنے اور گھٹنے درد کرنے لگ گئے ہیں۔ ان پر سوجن بھی ہوگئی ہے۔ ڈاکٹر نے پیشاب کے انفیکشن کی دوائیں استعمال کروائیں۔ سوجن قدرے کم ہوگئی لیکن گھٹنوں اور ٹخنوں میں متواتر درد موجود ہے۔ پیشاب کا انفیکشن ٹھیک ہوگیا ہے۔ میرا دوسرا مسئلہ پیٹ کا ہے وزن ساٹھ کلو ہے‘ قد پانچ فٹ ہے‘ میری ٹانگوں اور بازوؤں پر چربی بالکل نہیں ہے۔ کولہے بھی نہ ہونے کے برابر ہیں۔ میں نے ورزش بھی کرکے دیکھ لی‘ ادویات بھی کھاکر دیکھ لیں‘ تمام جسم پر اثر ہوتا ہے سوائے پیٹ کے۔۔۔۔۔۔ (حمیرا‘راولپنڈی)
مشورہ: صبح و شام چہل قدمی کریں‘ انشاء اللہ فائدہ ہوگا۔ ذیابیطس کے مریضوں کو دل اور گردوں کا خاص خیال رکھنا چاہیے۔ کولیسٹرول اور بلڈپریشر باقاعدہ تسلسل سے وقتاً فوقتاً چیک کرتے رہنا چاہیے۔ الٹراساؤنڈ بھی کروائیں۔ نارمل ہو تو صبح و شام کی واک مفید ہے۔غذا نمبر4استعمال کریں۔
ہڈیوں کا ڈھانچہ
میری عمر 25سال ہے اور گزشتہ تقریباً چھ سال سے مختلف امراض میں مبتلا ہوں۔ میں نے اوائل جوانی میں جوش و جذبات میں خود کو تباہ کرلیا تھا۔ اٹھارہ سال تک صحت پھر بھی غنیمت تھی لیکن تقریباً چھ سال قبل خسرہ کے سبب شدید اعصابی و جسمانی کمزوری میں مبتلا ہوگیا ہوں‘ تقریباً ایک سال بعدگرمیوں میں شدید لو لگنے کے سبب تیز بخار آگیا تھا جو دن میں وقفے وقفے سے چڑھتا اور اترتا رہا‘ تقریباً ایک ہفتہ کے اس بخار نے تو مجھے بالکل تباہ و برباد کرکے رکھ دیا۔ رہی سہی جسمانی و اعصابی قوت بالکل ختم ہوکر رہ گئی۔ جسم سوکھ کر ہڈیوں کا ڈھانچہ بن گیا۔ آنکھیں اندر کو دھنس گئیں۔ چہرہ بے رونق اور آنکھیں زرد ہوگئیں۔ اس کے بعد سے ہزار تدبیریں کرچکا ہوں لیکن نہ تو صحت بحال ہوتی ہے نہ اعصاب مضبوط ہوتے ہیں اب حالت یہ ہے کہ اچھی سے اچھی غذا کھاتا ہوں لیکن معدہ ٹھیک کام نہیں کررہا۔ ہمیشہ گیس اور کبھی کبھی قبض بھی رہتا ہے‘ منہ سے ہمیشہ ناگوار سی بو آتی ہے۔ دماغ میں نزلہ سا جما ہوا معلوم ہوتا ہے جو سر کے نچلے حصے سے لےکر آنکھوں تک حرکت کرتا ہے۔ ذرا سی تیز روشنی یا دماغی کام کرنے سے سر میں درد شروع ہوجاتا ہے۔ جسمانی حالت قابل رحم ہے رنگت سیاہ ہوگئی ہے اگر کوئی تیز آواز سن لوں تو دل کی دھڑکن تیز ہوجاتی ہے۔ (عبدالجبار‘ ملتان)
مشورہ: جوارش جالنیوس تین تین گرام غذا کے بعد دن میںتین بار کھائیں۔ پندرہ دن کے بعد دوبارہ لکھیں۔ غذا میں صرف بکرے کا گوشت اورروٹی کھائیں۔غذا نمبر2 استعمال کریں۔
گرمی کا مریض
میری عمر 22سال ہے اورکافی عرصہ سے گرمی کا مریض ہوں‘ دوائیں وغیرہ کھاتا ہوں مگروقتی آرام ہوتا ہے‘ دوسرا مسئلہ یہ ہے کہ مجھے بدخوابی بہت زیادہ ہوتی ہے جس کی وجہ سے نماز میں بھی پریشانی ہوتی ہے مگر اب کچھ دوائیاں کھانے کے بعد کافی کم ہوگیا ہے۔ (ابراہیم‘ چیچہ وطنی)
مشورہ:شربت بزوری معتدل2 اونس ایک گلاس پانی میں ملا کر صبح و شام پئیں۔ انڈا اور گرم مصالحے نہ کھائیں۔ جسم میں گرمی زیادہ ہوگئی ہے۔۔ غذا نمبر 1استعمال کریں۔
جوانی واپس نہیں آئی
میری عمر 22 سال ہے غیر شادی شدہ ہوں غلط سوسائٹی کی وجہ سے جوانی برباد کرلی ہے۔ شادی نزدیک ہے۔ دو سال سے برے کام چھوڑ دئیے ہیں لیکن صحت اور جوانی واپس نہیں آئی۔ غذا جزوبدن نہیں بنتی۔ کمر میں اور ٹانگوں میں درد ہوتا ہے۔ کوئی اچھا سا علاج بتائیں۔ (قیصر‘ بہاولپور)
مشورہ: اچھی عمدہ متوازن غذا کھائیں۔ کھیل کود میں حصہ لیں‘ غم وفکر سے دور رہیں۔ صحت بحال ہوگی اور اپنے وقت پر جوانی بھی آئے گی۔ غذا نمبر 2استعمال کریں۔

گھٹنے کا درد نہیں گیا

مجھے ایکسیڈنٹ میں کمر اور گھنٹے میں چوٹ لگی جبکہ ایکسرے نارمل تھے۔ درد کی گولیاں کھا کر آرام آگیا مگر گھٹنے کا درد نہیں گیا‘ واپس امریکا پہنچ کر درد زیادہ ہوگیا۔ ڈاکٹروں نے برف کی ’’ٹکور‘‘ کروائی اس سے تکلیف بہت ہوگئی۔ ادھر ادھر کے تیل بھی بہت ملے‘ ہلدی‘ چونا وغیرہ سے بھی فائدہ نہیں ہوا۔ (شمشیر علی‘ چونیاں)
مشورہ: شہد اور تلوں کے تازہ نکلے ہوئے تیل میں ذرا سا چونا ملا کر چوٹ کی جگہ پر لیپ کرکے 5 سے 7منٹ دھوپ میں بیٹھیں۔ روزانہ اس طرح کریں‘ انشاء اللہ پانچ سات روز میں تکلیف جاتی رہے گی۔غذا نمبر 2 استعمال کریں۔
کروٹیں بدلتی ہوں
پہلے میں جس کروٹ سوتی تھی اسی کروٹ صبح اٹھتی تھی مگر اب رات بھر کروٹیں بدل بدل کر تھک جاتی ہوں‘ نیند نہیں آتی۔ مجھے دو ماہ پہلے بخار ہوا تھا‘ بہت ساری دوائیں کھائیں‘ اس کے بعد سے نیند غائب ہوگئی۔ (زبیدہ بی بی‘ راولپنڈی)
مشورہ: خالص تازہ مکھن کم از کم دو اونس صبح ناشتے میں کھائیں۔ سر میں بھی خالص تازہ مکھن ملیں۔غذا نمبر 2 استعمال کریں۔
بری عادت میں پھنس گئی
بچپن میں کچھ غلط دوستوں کی صحبت کی وجہ سے میں بری عادت میں پھنس گئی تھی‘ جوانی کی دہلیز پر قدم رکھتے ہی میں اپنی وہ عادت ختم کرچکی ہوں‘ لیکن اس غلط عادت کی وجہ سے میں بیمار ہوگئی ہوں۔ بار بار غسل کرنا پڑتا ہے جس سے کافی شرمندگی ہوتی ہے میں یہ مسئلہ کسی کو بتا بھی نہیں سکتی۔ لیکن بہت پریشان ہوں۔ (پوشیدہ)
مشورہ: اصلی موصلی سفید‘ موصلی سیاہ ہم وزن‘ ان دونوں کے وزن کے برابر پھول مکھانے پھر ان تینوں دواؤں کے برابر چینی کوٹ کر باریک سفوف بنالیں‘ آدھی چمچی یہ سفوف نیم گرم دودھ کے ساتھ صبح و شام پھانک لیں۔ اکیس دن کے بعد دوبارہ حال لکھیں‘ پریشانی کی کوئی بات نہیں۔غذا نمبر1 استعمال کریں۔
غلط حرکت
میرا قد 5 فٹ نو انچ ہے۔ عمر 23 سال ہے۔ میری جسامت بہت پتلی ہے‘ خصوصاً میری کلائیاں بہت کمزور ہیں۔ میں سات سال سے ویلڈنگ کا کام کرتا ہوں اس کام میں اچھی خاصی ورزش بھی ہوجاتی ہے۔ میری خوراک بھی ٹھیک ہے‘ بھوک لگتی ہے اور کوئی بیماری بھی نہیں ہے مگر ہر ہفتے بعد مجھ سے کچھ غلط حرکت ہوجاتی ہے۔ میں چاہتا ہوں کہ کسی طرح سے مجھ سے یہ حرکت چھوٹ جائے کیونکہ میری شادی بھی نزدیک ہے۔ (اسماعیل‘ لودھراں)
مشورہ: اس کا آسان حل شادی ہے‘ شادی کے بعد انشاء اللہ آپ کی جسمانی حالت ٹھیک ہوجائیگی۔غذا نمبر1 استعمال کریں۔
بھوک نہیں ہے
پچھلے سال مئی میں مجھے یرقان ہوگیا۔ اس کا علاج حکیمی ہوا۔ اللہ نے شفاء دی۔ اس کے بعد سے بھوک نہیں لگتی۔ کچھ زبردستی کھالوں تو طبیعت بہت خراب ہوجاتی ہے۔ گیس بہت بنتی ہے‘ چہرہ زرد اور چھائیاں سی نظر آنے لگتی ہیں۔ ہاتھوں کی ہتھیلیاں گرم رہتی ہیں۔ ٹیسٹ نارمل آتے ہیں جگر کا ٹیسٹ بھی نارمل ہے۔ (زہرا بی بی‘ گجرات)
مشورہ: مفرح بارد چھ گرام صبح و شام کھائیں۔ غذا کے بعد دوپہر رات کو جب کبد نوشادری ایک ایک گولی کھائیں۔ سبزیاں‘ پھل‘ خاص طور پر انگور مفید ہیں۔ تین ہفتے کے بعد دوبارہ لکھیں۔غذا نمبر 3 استعمال کریں۔
شوگر کی کمزوری
شوگر ہے‘ کمزوری بہت ہے‘ آپ کوئی ایسا نسخہ لکھیں جو بنانے میں آسان ہو اور ہر مریض خود تیار کرسکے کیونکہ معلوم ہے کہ یہ مرض ساری عمر کے لیے ہے‘ روز دوا بھی کھانی پڑتی ہے۔ ایسا خاص نسخہ ہو جو شوگر کی کمزوری کو دور کرتا ہو‘ ہاتھوں پیروں میں جان رہے‘ خاص طور پر دماغ میں اور دل میں قوت رہے جسم کو کھوکھلا نہ ہونے دے۔ شادی شدہ مریضوں اور بوڑھے لوگوں کی کیفیت کو بھی سامنے رکھیں۔ (سلطان‘ مانسہرہ)
مشورہ: کریلا سبز بیج نکال کر نیم کے سبز پتے دس دس گرام نیم کے پتوں کو اچھی طرح دھولیں پھر دونوں دوائیں ایک اچھی نہ گھسنے والی کھرل میں ڈال کر رگڑیں۔ ضرورت ہو تو دو چار قطرے پانی کے ڈال سکتے ہیں جب چٹنی سی بن جائے تو جامن کی گٹھلی کا مغز‘ مغز کرنجوہ‘ کالی ہریڑ‘ہرایک دس گرام کوٹ چھان کر سفوف بنالیں اور اسی کھرل میں ڈال کر پیس لیں۔ ضرورت ہو تو تھوڑا سا ضرورت کے مطابق پانی شامل کرسکتے ہیں۔ جب خوب خوب باریک ہوجائے تو چنے سے ذرا بڑی گولیاں بنا کر خشک کرلیں۔ یہ ایک ایک گولی صبح ناشتے کے دو گھنٹے بعد اور شام کو چائے کے بعد کھائیں۔ اس کے علاوہ شوگر کے مریضوں کی کمزوری دور کرنے کیلئے ایک خاص نسخہ حکیم دوست محمد صابر ملتانی رحمۃ اللہ علیہ نے لکھا ہے وہ بھی ہدیہ قارئین ہے:۔
حرمل‘ خراطین مصفی خشک ہموزن کوٹ چھان کر کھرل میں ڈال کر ذرا سا پانی شامل کرکے کھرل کریں جب گولی بنانے کے قابل ہوجائے تو چنے کے دانے کے برابر گولیاں بنالیں اور خشک ہونے پر غذا کے بعد ایک ایک گولی دوپہر رات کو پانی سے کھائیں۔ ہائی بلڈپریشر‘ گردوں کی خرابی‘ پیٹ کی خرابی میں یہ ادویات استعمال نہیں کرنی چاہئیں۔ غذا نمبر 4 استعمال کریں۔
بائی پاس کے بعد…
میرے دو بائی پاس آپریشن ہوچکے ہیں۔ ڈاکٹروں کی دوائیں مستقل کھاتی ہوں‘ پرہیز بھی پورا کرتی ہوں‘ چل پھر نہیں سکتی‘ بس گھر میں ہی کام کاج میں جتنا چلنا پھرنا ہوتا ہے۔ یورک ایسڈ بڑھ جاتا ہے جو دوا لینے سے گھٹ بھی جاتا ہے مگر مستقل شفا نہیں ہے۔ دوائیں کھاتے کھاتے میرے پیٹ میں بہت گیس بننے لگی ہے۔ دن رات پیٹ میں گُو گُو ہوتی رہتی ہے۔ قبض کی شکایت بھی ہے‘ آگرہ میں ایک پرانے نوے سال سے بھی زیادہ عمر کے حکیم کو نبض دکھائی تو انہوں نے معدہ میں ورم بتایا اور ریاح باسوری تشخیص کی مگر ان کی معجون کھانے سے معدے میں شدید سوزش ہوئی اور اتنی تکلیف ہوئی کہ میں سمجھی ہارٹ اٹیک ہے پورا سینہ جل اٹھا‘ ایمرجنسی میں ہسپتال بھاگنا پڑا مگر شکر ہے وہ صرف معدہ کی سوزش تھی۔ (زیتون بی بی‘ کراچی)
مشورہ: حکیم صاحب کی تشخیص بالکل درست تھی اور تجویز کردہ ادویات بھی سوفیصد درست تھیں۔ اگرچہ ان کے نسخے کی کاپی آپ نے ہمیں فراہم نہیں کی‘ نہ دواؤں کے نام لکھے ہیں۔ یہ نسخہ باقی کیفیات کیلئے استعمال کرنا چاہیے۔ دیسی اجوائن تین گرام‘ پودینہ دیسی خشک‘ برگ سداب‘ تیزپات ایک ایک گرام ایک کپ پانی میں پکا کر چائے کی چھلنی سے چھان کر غذا کے بعد دن میں دوبار پئیں۔ برگ سداب شاید وہاں نہ ملے تو باقی دوائیں بھی کافی ہیں۔ قبض کیلئے سناء مکی گرائنڈر میں باریک کرکے ایک چٹکی سوتے وقت کھاسکتی ہیں مگر حسب ضرورت اور وقت ضرورت۔ انشاء اللہ فائدہ ہوگا اور تیسرے بائی پاس کی بھی ضرورت نہیں پڑے گی مگر ایلوپیتھک دوائیں ڈاکٹر صاحبان کی ہدایت کے مطابق ضرور لیتی رہیں۔غذا نمبر 3 استعمال کریں۔
سر میں دباؤ
میرا ایک مسئلہ ہے میں بی اے کی طالبہ ہوں‘ کچھ دنوں سے میرے سر کے پچھلے حصے میں دباؤ سا محسوس ہوتا ہے۔ اس کے سوا مجھے کوئی تکلیف نہیں ہے۔ کبھی یہ دباؤ ایسے ہوتا ہے جیسے کسی نے سر کے پیچھے زور سے پکڑا ہو۔ (ش۔ ر۔ لاہور)
مشورہ: آپ فوری طورپر نظر کا معائنہ کرائیں‘ نظر کمزور ہو تو ڈاکٹر کے مشورے سے نظر کی عینک لگائیں‘ ٹی وی ہرگز نہ دیکھیں۔غذا نمبر 2 استعمال کریں۔
بات کرنا دشوار
پچھلے سال یرقان ہوا تھا‘ یرقان کیلئے ڈرپ چڑھائی گئی کچھ دوائیں بھی کھائیں‘ یرقان کی رپورٹیں نارمل ہوگئیں‘ دو ہفتے کے بعد پھر وہی حالت ہوگئی‘ اس کے بعد بدہضمی کی شکایت ہوگئی۔ پیٹ پھول جاتا ہے‘ سانس نہیں لیا جاتا‘ منہ سے ایسی بدبو آنی شروع ہوگئی ہے کہ پورے کمرے میں پھیل جاتی ہے بات کرنا دشوار ہوچکا ہے۔ (ساجد‘ اسلام آباد)
مشورہ: سونٹھ‘ کالی مرچ‘ فلفل دراز‘ نوشادر ٹھیکری دس دس گرام‘ پودینہ خشک بیس گرام‘ گندھک آملہ سار‘ میٹھا سوڈا‘ ریوند خطائی‘ سونف ہر ایک چالیس گرام‘ لاہوری نمک اسی گرام‘ کوٹ چھان کر چورن بنا لیں یہ دوائی بلڈپریشر اور معدے کے السر و سوزش کے مریض استعمال نہ کریں۔ ایک یا دو چٹکی دوا غذا کے بعد دن میں تین بار کھاسکتے ہیں۔ پہلے آدھی چٹکی یعنی رتی بھر کھا کر دیکھیں اگر کوئی تکلیف محسوس نہ ہو تو ایک چٹکی کھائیں‘ اس سے بھی کوئی تکلیف نہ ہو تو دو چٹکی بھی کھاسکتے ہیں۔غذا نمبر 1 استعمال کریں۔
گھٹنے کا درد
میرے گھٹنے میں اچانک درد شروع ہوا‘ میں سمجھی گھٹنا مُڑ گیا۔ کچھ عرصے میرے دوسرے گھٹنے میں بھی درد ہونے لگا اور اس طرح کرتے کرتے میرے دوسرے جوڑوں میں بھی درد شروع ہوگیا‘ اب جسم کے تمام جوڑوں میں درد ہے۔ ڈاکٹری علاج سے وقتی آرام آجاتا ہے لیکن پھر درد شروع ہوجاتا ہے۔ میرے سینے اور پیٹ میں بھی سخت تکلیف رہتی ہے۔ (سویرا‘ بہاولپور)
مشورہ: فی الحال ہرے ناریل کا پانی دن میں تین بار پئیں۔ عرق گلاب خالص ایک کپ میں ایک رتی کافور حل کرکے کلیاں کریں۔ ایک دو مہینے یہ تدبیر کرکے دوبارہ مشورہ کریں۔غذا نمبر 2 استعمال کریں۔
رطوبت گرتی ہے
لمبے عرصہ سے حلق میں رطوبت گرتی ہے۔ اس کی وجہ سے دماغ کمزور ہوگیا ہے اور بال گرگئے ہیں جو بال باقی بچے ہیں وہ سفید ہوچکے ہیں۔ حکیموں سے علاج کروانے سے چند روز کبھی افاقہ بھی ہوا مگر مستقل شفاء یابی نہ ہوئی۔ حلق میں خشکی اور جلن بھی ہوتی ہے پیشاب میں بھی تیزابیت ہے خاص طور پر نزلہ کا علاج کروانے پر کیفیات بڑھ جاتی ہیں۔ (ماجد‘کوئٹہ)
مشورہ: یہ نزلہ حار معلوم ہوتا ہے۔ مغز بادام شیریں‘ مغز کدو شیریں‘خشخاش سفید ہر ایک سو گرام‘ سوکھا دھنیا‘ مغز فندق ہر ایک پچاس گرام‘ سو گرام چینی ملاکر کوٹ چھان لیں۔ چائے کی چمچی بھر صبح پانی سے پھانک لیا کریں مگر خبردار… یہ دوا پاکستان سے باہر لیجانے کی کوشش نہ کریں بعض ملکوں میں خشخاش اور پوست خشخاش لے کر جانا منع ہے بلکہ موت کی سزا ہے۔ پارسل سے بھی نہ بھیجیں یہ بھی ویسا ہی جرم ہے۔غذا نمبر 2 استعمال کریں۔

خوشبو

خوشبو جہاں آپ کو تازگی اور خوشگواریت کا احساس دلاتی ہے وہاں یہ آپ کی یادداشت پر بھی مثبت اثرات مرتب کرتی ہے اور دوران نیند خوشبو آپ کی یادداشت میں تیزی کا باعث بنتی ہے اس کی مدد سے آپ آسانی سے دوران نیند اپنی گزری باتوںکو دہرا سکتے ہیں۔ پھول کے گلدستے کی خوشبو آپ کی پڑھائی کے دوران اور سونے کے بعد آپ کی ذہانت میں پندرہ فیصد تک اضافہ کرتی ہے۔
جنرل سائنس کے ایک حالیہ مطالعے میں دوران نیند خوشبو کی مدد سے ایک انسانی دماغ کا ٹیسٹ لیا گیا جس کا نتیجہ یہ نکلا کہ تازہ ترین معلومات پرانی معلومات کی نسبت دماغ میں زیادہ دیر تک رہتی ہیں جس سے دہرائی کے عمل میں اضافہ اور آپ کی ذہانت کی رفتار بھی بڑھتی ہے۔
اس تحقیق نے سائنس دانوں کو تشویش میں مبتلا کردیا کہ ایسا کیسے ممکن ہے کہ خوشبو آپ کی یادداشت کو بہتر بناسکتی ہے۔ نئی تحقیق سے نہ صرف یہ بات ثابت کرنے کی کوشش کی گئی ہے کہ نیند آپ کی یادداشت کی بہتر کارکردگی کیلئے ضروری ہے بلکہ اس تحقیق کے بہتر نتائج پانے کیلئے چند طالب علموں پر تجزیہ کیا گیا تمام طلباء کو کمپیوٹر پر کام کے دوران خوشبو دارماسک پہنایا گیا اس کے بعد طلباء کی دماغی کارکردگی کا گہری نیند اور کم گہری نیند میں مشاہدہ کیا گیا تو پتہ چلا کہ گہری نیند میں تمام طلباء کے کمپیوٹر پر کیا جانے والا تمام کام بہت بہتر طریقے سے دہرایا۔ دہرائی کا یہ عمل پہلے بیس منٹ میں بھی ہوسکتا ہے ایک گھنٹے میں یا پھر کچھ دیر کے بعد بھی شروع ہوسکتا ہے۔ طلباء کی نیند کے دوران پھولوں کے گلدستے ان کے سرہانے رکھ دئیے گئے اور کوشش کی گئی کہ نیند میں مداخلت نہ ہو۔ طلباء کے جاگنے کے بعد جب ان سے اس کے متعلق پوچھا گیا تو انہوں نے کسی چیز سے متعلق یادداشت کی دہرائی سے لاعلمی کا اظہار کیا لیکن سوالات کے دوران پتا چلا کہ تمام باتیں ان کی یادداشت میں محفوظ ہوچکی ہیں۔ اس طرح ایک اور تجربہ کیا گیا کہ تمام طلباء کو دوبارہ جب سلایا گیا تو ان کے کمروں سے خوشبو کو دور کردیا گیا اور جب بعد میں مشاہدہ کیا گیا تو پتہ چلا کہ طلباء کی یادداشت متاثر ہوئی ہے  اور وہ اس طرح جواب نہ دے سکے جس طرح وہ سونے سے پہلے خوشبو کے استعمال کے بعد دے سکے تھے۔ ان تمام تحقیقات سے یہ بات ثابت ہوئی کہ اگر گہری نیند کے دوران خوشبو سے ہمارے دماغ میں ابلاغ کرنے کی صلاحیت بڑھ جاتی ہے جس کی وجہ ہمارے دماغ کی گہرائی میں موجود ٹشوز  کارکردگی بہتر کرتے ہیں۔ کہتے ہیں جہاں ہمارے پورے دن میں ہونے والی باتوں کا ریکارڈ موجود ہوتا ہے۔ یہ ان ٹشوز کے باعث ہی ممکن ہے جو خوشبو کو ہماری یادداشت سے اس طرح جوڑ دیتے ہیں کہ ہم بھولی ہوئی باتوں کو بھی یاد کرسکتے ہیں۔ سائنسدانوں کے مطابق دوران نیند خوشبو آپ کی تخیلاتی صلاحیتوں میں اضافہ کرتی ہے اور طلباء میں امتحان کے خوف کو کم کرنے میں خوشگواری کا احساس ہی پیدا نہیں کرتی بلکہ آپ کی یادداشت کیلئے بھی ایک بہترین دوا کاکام کرسکتی ہے۔ آپ خوشبو کی مدد سے اپنی یادداشت میں اضافہ کرسکتے ہیں اور خواب کی صورت میں اپنے ماضی کے علم کو دہرا سکتے ہیں۔ یہ تحقیق تمام لوگوں کے ساتھ ساتھ طلباء کیلئے بھی بے حد مفید ہے۔
گلاب کھاؤ اور گلاب ہوجاؤ
(حکیم آزاد شیرازی رحمۃ اللہ علیہ )
گلاب کو کسی بھی نام سے پکاریں گلاب ہی رہے گا۔گل سرخ کا مزاج جمہوری اطباء کے نزدیک سرد خشک ہے لیکن بعض اطباء کے نزدیک یہ مرکب القوی ہے۔ اس میں دونوں مختلف قوتیں موجود ہیں اور برودت سے زیادہ حرارت پائی جاتی ہے۔بطور دوا اس کا پھول ہی مستعمل ہے۔ یہ پھول مفرح قلب بھی ہے اور اعضائے رئیسہ کو بھی قوت بخشتا ہے‘ جسم کو بھی طاقت دیتا ہے‘ معدہ اور آنتوں کو بھی قوت دیتا ہے‘ دست بھی لاتا ہے‘ قبض بھی پیدا کرتا ہے‘ پسینے کو خوشبودار بناتا اور پیاس کی شدت کو کم کرتا ہے‘ باریک پیس کر لگانے سے زخموں کو بھی خشک کرتا ہے‘ گلاب کا تازہ پھول سونگھنا مفرح اور مقوی قلب و دماغ ہے‘ آشوب چشم کے لیے عرق گلاب آنکھوں میں ڈالنا مفید ہے۔ نیز خفقان اور درد شکم کو زائل کرتا ہے۔ عرق کشید کرنے کیلئے تازہ پھول اور ایک سیر کو دس سیر پانی میں بھگو کر پانچ سیر عرق کشید کیا جاتا ہے اگر دو آتشہ یا سہ آتشہ بنانا چاہیں تو اسی عرق میں مزید پھول ڈال کر 
دوبارہ سہ بارہ کشیدکیا جاتا ہے۔گلقند گل سرخ کا ایک مفید مرکب ہے‘یہ تازہ پھولوں ہی سے تیار کرنا چاہیے جس کا طریقہ یہ ہے کہ پھولوں کی پتیاں چن لیں اور اس میں دوگنا چینی ڈال کر ہاتھوں سےباہم مل کر کسی شیشے کے برتن میں ڈال کر پندرہ یوم تک دھوپ میں رکھیں اور وقتاً فوقتاً ہلا دیا کریں۔ اس گلقند کو آفتابی گلقند کہتے ہیں۔ گلقند دماغ اورمعدہ کو قوت دیتا ہے قبض کو رفع کرتا ہے۔ اس کی مقدار خوراک4تولہ دودھ یا عرق بادیان سے کھلائیں۔ بچوں کیلئے نصف مقدار کافی ہے۔ شیر خوار بچوں کو عرق گلاب بھی پلایا جاسکتا ہے۔ قبض کیلئے مفید ہے اور اسہال میں بھی کارآمد ہے۔ ایک طبیب حکیم انقلاب صابر ملتانی نے ٹی بی کےلئے ایک مفت نسخہ چیلنج کے ساتھ پیش کیا تھا جو ہلدی اور آک کے دودھ سے تیار ہوتا ہے ۔ مرحوم نے 1958ء میں یہ نسخہ ظاہر کیا اور راقم الحروف نے آج تک یہ دوائی جس مریض کو دی وہ شفایاب ہوگیا۔ البتہ اس کے ساتھ گلقند اور سفوف سرطانی بکری کے دودھ کے ساتھ دیتا ہوں۔ خصوصاً قبض کے مریض کو گلقند دیتا ہوں۔ شیخ الرئیس بوعلی سینا کا یہ مجرب نسخہ ہے کہ سل کے مریض کو تازہ گلقند کھلایا جائے اور خوب کھلایا جائے یہاں تک کہ روٹی بھی اس کے ہمراہ کھلائی جائے۔ بشرطیکہ کے دست نہ آئیں۔ میرے تجربے میں یہ دونوں نسخے آتے ہیں بلکہ معمول مطب ہیں۔ لہٰذا میرا نظریہ ہے کہ ’’گلاب کھاؤ اور گلاب ہوجاؤ‘‘

چھری یا چاقو سے کٹ لگ جائے

محترم  السلام علیکم! میرے تجربات میں کچھ نسخہ جات ہیں جو میں نے خود بھی آزمائے ہیں اور لوگوں کو بھی دئیے جس سے ان کو بھی بہت فائدہ ہوا ہے۔
چھری یا چاقو سے کٹ لگ جائے تو
اگر چھری یا چاقو سے پھر کسی اور آلہ سے ہاتھ پاؤں کی انگلیاں کٹ جائیں یا پھر جسم کا کوئی حصہ کٹ جائے خون جاری ہوجائے اور وہ بند نہ ہورہا ہو تو اس کیلئے ایک بوٹی ہے جس کو ہماری ہندکو زبان میں ھولہ کہتے ہیں اور غالباً اردو زبان میں اس کو جنگلی پالک کہتے ہیں عام پالک جو سالن پکا کر کھائی جاتی ہے اس سے اس ھولہ کے پتے تھوڑے لمبے بھی ہوتے اور تھوڑے زیادہ چوڑے بھی ہوتے ہیں یہ بوٹی عام طور پر ہمارے علاقے ایبٹ آباد اور حویلیاں کے گردونواح میں زیادہ پائی جاتی ہے اس کے پتے عموماً اپریل مئی سے لے کر ستمبر اکتوبر تک ہرے ہوتے ہیں اس کے بعد سردی سے خشک ہوکر ختم ہوجاتے ہیں اس کی جڑ تقریباً ایک بالشت ہوتی ہے سب سے چھوٹی انگلی کی طرح موٹی ہوتی ہے اس کے پتے اور جڑ لیمن سے تھوڑے کم کھٹے ہوتے ہیں۔ یہ بوٹی عموماً گوبر کے ڈھیروں کے قریب بھی پائی جاتی ہے اور عام طور پر کھیتوں کی سائیڈ پر بھی پائی جاتی ہے اور ٹھنڈی جگہ پر بھی پائی جاتی ہے جب بھی ہاتھ پاؤں کے اوپر کسی تیز آلہ سے کٹ لگ جائے اگر یہ بوٹی زمین پر موجود ہو تو فوراً لنگری میں ڈال کر یا پھر ویسے کسی پتھر پر رکھ کر اوپر سے پتھر کے ساتھ کوٹ کر بالکل لئی سی بن جائے اس کے فوراً بعد زخم پر رکھ کر کسی عام کپڑے کی پٹی بنا کر اوپر باندھ دیں آدھا گھنٹہ کے بعد پٹی کھول بھی دیں تو آپ کو زخم کا کٹ تو نظر آئے گا لیکن انشاء اللہ خون نکلنا بند ہوجاے گا اور زخم کا کٹ بھی چند دنوں کے بعد ٹھیک ہوجائے گا۔ یہ میرا تجربہ شدہ نسخہ ہے۔ آج سے تقریباً دو ڈھائی ماہ پہلے مجھے اپنے دائیں ہاتھ سے چاقو کے ساتھ ناریل کاٹتے ہوئے بائیں ہاتھ میں سب سے چھوٹی انگلی کو کٹ لگ گیا تھا کوئی اور دوائی بھی میرے پاس نہیں تھی جس سے فائدہ حاصل کرتا‘ انگلی پر پانی ڈالتا رہا لیکن خون بند نہیں ہورہا تھا‘ فوراً اس بوٹی کے پتوں کو تلاش کیا‘ عام پتھر پر رکھ کر اوپر سے عام پتھر سے کوٹ کر لئی سی بنا کر زخم پر رکھ کر اوپر سے عام کپڑے کی پٹی باندھ دیں آدھ گھنٹہ بعد میں نے انگلی سے پٹی اتار دی تو زخم کا کٹ نظر آرہا تھا اللہ کے فضل سے خون بالکل بند تھا۔
 جوڑوں کے درد اور پٹھوں کی
 کمزوری کیلئے مجرب نسخہ
 یہ نسخہ میں نے ایک پنسار والے سے لیا ہے۔ ھوالشافی: ستاور ایک تولہ‘ اسگندھ ایک تولہ‘ بداری کند ایک تولہ‘ سنڈھ ایک تولہ‘ سنبل موصلی ایک تولہ سب اشیاء برابر وزن کوٹ پیس کر چھان کر صبح و شام پانی یا نیم گرم دودھ کے ساتھ استعمال کریں۔ ساتھ معجون سورنجاں آدھا چمچ کھانے کے بعد آدھ گھنٹہ پانی کے ہمراہ لیں۔
سرعت انزال جریان‘ احتلام کیلئے مجرب نسخہ
ھوالشافی: ثعلب مصری‘ ثعلب پنجہ‘ گوند ڈھاک‘ کتیرہ‘ الائچی خورد‘ بہمن سفید‘ بہمن سرخ سب اشیاء کو برابر وزن کوٹ پیس کر چھان کر صبح وشام نیم گرم دودھ کے ہمراہ کھانے کے آدھا گھنٹہ بعد لیں۔
مردانہ طاقت کیلئے نایاب نسخہ
مشک ایک ماشہ‘ زعفران خالص پانچ دانہ‘ قرنفل ایک تولہ‘ جوزگل ایک تولہ‘ خولنجان ایک تولہ‘ جوزبوا ایک تولہ‘ عقرقرحا ایک تولہ‘ افیون دو ماشہ۔ترکیب: زعفران اور مشک کو چینی والے کھرل میں کھرل کرلیں اور باقی چیزوں کو عام کھرل میں کرلیں پھر اس کے بعد چھوٹی چھوٹی گولیاں بنالیں رات کو دودھ کیساتھ ایک گولی استعمال کریں۔
مسجد میں ملا کامیاب نسخہ
یہ نسخہ مجھے ایک بزرگ نے مسجد میں دیا۔ ھوالشافی: تخم اوٹنگڑ سوگرام‘ تال مکھانہ سوگرام‘ سمندر سوکھ دو سو گرام‘ ان تینوں چیزوں کو کوٹ پیس کر سفوف بنالیں صبح و شام دس گرام کھانے سے قبل لیں پانی سے صبح کے وقت دس گرام رات کو سونے سے پہلے پانی کے ساتھ لیں۔
جریان و احتلام کیلئے میرا آزمایا ہوا نسخہ ہے جو حکیم عبداللہ صاحب رحمۃ اللہ علیہ کے بھائی کے دواخانہ کا ہے۔ ھوالشافی: خشک دھنیا‘ مصری ہم وزن لے کر کوٹ پیس کر سفوف بنالیں صبح خالی پیٹ ایک چمچ ٹھنڈے پانی کے ساتھ لے لیں۔
مردانہ کمزوری شاندار علاج
 پانچ تولہ لونگ لے لیں پھر توے پر ڈال کر اوپر کوئی بڑے کھلے منہ والی سلور کی پلیٹ رکھ کر بھون لیں زیادہ جلنے بھی نہ پائیں پھر ان کو آٹا کی طرح پیس کر کیپسول بھرلیں رات کو ایک سے دو کیپسول سونے سے قبل پانی سے لیں۔
ہاضم معدہ اور بدہضمی 
کھٹے ڈکار اور جلن کیلئے نسخہ
اجوائن سادہ آدھا کلو‘ لیموں تین کلو‘ کالی مرچ پچاس گرام‘ بھوری مرچ پچیس گرام‘ کالا نمک آدھ پاؤ۔ترکیب: لیموں کا رس نکال کر سادہ اجوائن میں ڈال کر سایہ میں خشک کرلیں پھر اس کے بعد باقی چیزیں بھی ڈال کر سفوف بنالیں۔ ایک چمچ پانی کے ساتھ کھانے کے بعد تین ٹائم لے لیں۔
خارش داد اور چنبل کیلئے خاندانی نسخہ
یہ ان کے خاندان کا نسخہ ہے جنہوں نے اس کو ہوا بھی نہیں لگنے دی میں نے اس نسخے کو حاصل کرکے چھوڑا کیونکہ میں اپنے شیخ حکیم طارق محمودصاحب کا ادنیٰ شاگرد تھا نسخہ یہ ہے:۔ سفید ویزلین آدھا کلو‘ سلفاڈایا ڈین گولیاں پچاس عدد‘ چالیس لاکھ کے انجکشن دو عدد‘ کورو فینی کال کیپسول پچاس عدد‘ سپٹران ڈی ایس گولیاں پچیس عدد ان سب چیزوں کو کوٹ پیس کر سفوف بنالیں۔ پھر سفید ویزلین کو ہلکی آنچ پر گرم کرلیں پھر سفوف ڈال کر چھڑی نما لکڑی سے آہستہ آہستہ مکس کرتے جائیں پھر نیچے اتارلیں ٹھنڈی ہونے پر چھوٹی چھوٹی ڈبیہ میں بھرلیں۔ خارش‘ دادچنبل اور زخم کیلئے مجرب نسخہ ہے۔