امریکہ انسانی تاریخ کی

امریکہ انسانی تاریخ کی غالباً سب سے زیادہ طاقتورسپر پاور کے مقام پر فائز ہے۔وہ اپنی جدید ترین ٹیکنالوجی سے مسلح فوجی قوت کی بنا پر دنیا کی سب سے بڑی فوجی طاقت اور پندرہ ٹریلین(ایک سو پچاس کھرب) ڈالر کی سالانہ پیداوار کے ساتھ دنیا کی سب سے بڑی معاشی قوت ہے۔
اس قدر طاقت ور فوجی اور معاشی قوت کے باوجود پچھلے دنوں ایک چھوٹے سے طوفان سینڈی نے امریکہ کے مشرقی ساحل پر حملہ کیا اور زندگی کا پہیہ معطل کردیا۔ہم نے اس طوفان کو ایک چھوٹا طوفان کہا ہے گرچہ یہ امریکی تاریخ کا سب سے بڑا طوفان تھا۔اسے چھوٹا کہنے کی وجہ یہ ہے کہ جس پر پروردگار کی حکمت اورمشیت ایسے طوفانوں کو پیدا کرتی ہے وہ اس کی قدرت کاملہ کے مقابلے میں بہت حقیر اور چھوٹے ہیں۔اس بات کا اندازہ اس حقیقت سے کیجیے کہ جس بحر اوقیانوس یا اٹلانٹک کے سمندر میں یہ طوفان آیا ہے اس کا مجموعی رقبہ چار کروڑ مربع میل سے زائد ہے۔اس عظیم سمندر سے تھوڑا سے پانی بھی چھلک جائے تو پورا امریکہ بہہ جائے گا۔
سینڈی نامی یہ طوفان امریکہ میں آیا جو کہ دنیا کا مرکزی ہے، اس لیے دنیا بھر کے میڈیا کی ساری توجہ اسی واقعے کی طرف تھی۔اس کے نتیجے میں پوری انسانیت نے اپنے ٹی وی اسکرینو ں پر یہ منظر دیکھا کہ پروردگار کی قدرت کاملہ کیا ہوتی ہے۔ کس طرح انسانوں کی بڑی سے بڑی طاقت اس کے سامنے کوئی حیثیت نہیں رکھتی۔
مگر آج کے انسان کی بدنصیبی دیکھیے کہ وہ سب سے بڑھ کر اسی عظیم پروردگار کو بھولا ہوا ہے۔ جس کے ہاتھ میں انسانوں کی پوری زندگی ہے۔ جس کی قدرت کی مٹھی میں یہ زمین ایک معمولی گیند سے بھی کم ہے۔ جس کی ہستی اور طاقت سب سے بڑی ہے۔۔۔انسان اسی رب سے غافل ہے۔ حتیٰ کہ وہ پاکستان بھی اسلام جس کا سرکاری مذہب ہے اور وہ امریکہ بھی جس کا سرکاری نعرہ ہی یہ ہے کہ ہے ۔۔۔ In God We Trus ۔ کیسا عجیب ہے یہ انسان اور کیسی عجیب ہے اس کی غفلت۔